Orrialde:AxularGero faksimile.djvu/32

<32>

zuela, eta halakoak bizia zor zuela, eta hala edekitzen zioten (Laert. lib. 6). Eta on lizate orai ere, halakoekin hala egin baledi.

Solon handiak ordenatu zuen, ezen aita batek bere semeari ofiziorik erakusten etzioenean, etzela seme hura bere aitaren faboratzera, beharrean ikhusiagatik ere, obligatu izanen (Plutar. in Solone.). Zeren ofiziorik ez erakusteaz, alfer eta gaixto izaiteko bidean eta perilean utzi baitzuen bere aitak.

Gimnosofista zerizten jende batzuek hain gaitzesten zuten alferkeria, ezen bethiere afalaitzinean deitzen baitzituzten presuna gazteak beregana, jakiteko ea zertan iragan zuten eguna, eta baldin frogatzen bazeien alferkeriarik, etzerauen afariak gaitzik egiten (Patricius, Lib. de republica).

Katon Zensorino hartzaz irakurtzen da (zeinek baitzuen alferren gainean esku eta bothere) ekhartzen zeraukatenean gizon bat bere aitzinera, akusaturik, erraiten zela ezen alferra zela; berehala, lehenbiziko gauza, eskuetako larrua hazkatzen eta ferekatzen zioela; eta baldin latz, lodi eta gogor edireiten bazioen, ahalik eta arintkiena utzten zuela. Baina baldin mehe, leun eta bera bazuen, alfertzat kondenaturik, falta gutigatik ere bortitzki gaztigatzen zuela (Plutar. in Vita Cato. Censor.).

Katon hark berak erraiten zuen, hirur gauzatarik bere mendean ahal bezanbat begiratu