Orrialde:AxularGero faksimile.djvu/510

<508>

handiago eta baliosago, mundu hunetako atsegin, plazer eta onhasun korporal guztiak elkharri iratxekirik baino.

Jainkoaren atseginak eta plazerak, gehienik ariman barrena dira. Eta barreneko atsegin hek garaitzen dituzte kanpoko atsekabeak, eta bai gorputzaren plazerak ere. Omnes sancti adiuvantur a Deo; sed intus, ubi nemo videt, dio San Agustinek (August. in Psalm. 53). Saindu guztiak dira Jainkoz lagunduak eta faboratuak. Ordea, non? Barrenean, nehork ikhusten eztuen lekhuan.

Baldin utzten baditutzu kanpoko plazerak, gorputzarenak, emanen zaizkitzu barrenekoak, arimarenak, izanen baitira ehunetan gorputzarenak baino handiagoak, eztiagoak eta abantailatuagoak. Eta baldin gorputzarenak utzirik, dasta bazinitza arimarenak, higuin lekidisketzu berehala gorputzarenak. Handik harat, lehen on eta gozo zeizkitzun atseginak eta plazerak, etzinituzke ikhusi ere nahi, eta ez aiphatu. Zeren orduan halako moldez argi lekidikezu zeure adimendua eta alda leheneko gogoa, non gauza guztiek lehen ez bezalako kolore bat, iduri bat eta zaphore bat har bailezakete.

328 Jainkoaren zerbitzariek badirudite kanpotik probe, eztheus, plazer gabe, hil hurranak. Ordea, Jondone Paulok dioen bezala, barrenean darabilate gorderik bizitzea, zein baita Jesu Kristo. Mortui, enim, estis, et vita vestra