<8> GOMENDIOZKO KARTA
Elizatik kanpoan zebiltzan jende batzuek, nahi zituztela, bere azken finean, gorputzak elizan sarthu eta ehortzi, zeure bisita hautsirik, Nafarroako Hirur Estatuak bildurik, joan zinen Gorthera. Eta han anhitz trabailu iraganik, kontrakarra izanik, ekharri zenduen, gero ere, behar zen erremedioa, eta handik harat, halako desordenuen debekatzeko ordenantza eta manamendua. Beraz, etzara zu ere, zeure aitzinekoen giristinotasunaren gibelatzaile izatu.
Bada, ez eta ohorearen iraungitzaile ere. Aitzitik, badirudi ezen zuk xedea aitzinatu duzula, marra iragan duzula, eta Echausko etxearen arropa gorriaz bestitzeko bidetan izan zarela. Zeren ezta eztakienik, ezen Erregek hartarakotzat hautatu eta izendatu zinituela. Eta kolpea huts egin bada ere, eztela zure faltaz edo zu hartako ez gai izanez huts
